“Нефтчи” янги футболчиларни таништирди

Аввал хабар берганимиздек, “Нефтчи” ФК бугун иккинчи давра ўйинлари олдидан янги футболчиларни таништирув маросимини ташкил этди.

Режага кўра тақдимот маросими икки қисмдан иборат бўлди. Соат 9:30да бошланган тадбирнинг биринчи бўлими савол жавоб билан ўтказилди.

Унда давралар оралиғида таркибга янги келиб қўшилган Акмал Холматов, Андрей Акопянц, Шерзод Ҳакимов, Сардор Мирзаев, Умид Қодиров ҳамда Сардор Раҳмонов қатнашди. Шунингдек клуб раиси Тоҳир Кападзе ҳам анжуманда иштирок этиб, журналистлар ва мухлислар томонидан берилган саволларга бафуржа жавоб бериб ўтди.

Тоҳир Вейсалович дастлаб сўзга чиқиб, жумладан шундай деди: - Аввало ушбу тадбирга келганинглар учун ва иккинчи давра ўйинлари бошланаётгани муносабати билан сизларни табриклайман. Сизларни бу ерда кўриб турганимдан хурсандман. Олдимизга қўйган мақсадларимиз улкан, бу йўлда астойдил ишламоқдамиз. Танаффус вақтида мураббийлар штаби билан маслаҳатлашган холда, таркибни кучайтиришга эришдик. Мен шундай фикрдаманки, Фарғона футболини унинг тарбияланувчилари кўтариши керак. Шунинг учун ҳам “Нефтчи” учун бегона бўлмаган футболчиларни ва шу билан бирга маҳоратли ва иқтидорли ўйинчиларни сафимизга қўшиб олдик. Умид қиламанки селекция жараёнида фойдали харидларни амалга тоширдик. Сизлар кўриб турган футболчилар иккинчи даврада ўйинимизни кучайтиришга қодир деб айта оламан. Айни пайтда буни футболчилар ҳам яхши хис этиб турибди ва улар ўзларини кўрсатиш учун бор имкониятини ишга солади деб умид қиламиз. Янги ўйинчиларни нафақат майдондаги имкониятини балки, уларнинг хаётда тутган ўрнини ҳам ҳисобга олдик. Улар бизнинг қарашларимизга тўла мос тушади. Бундан мураббийларимиз хурсанд. Насиб қилса мухлислар ҳам иккинчи давра ўйинлари мобайнида хурсанд бўлади.  

- Тўғри, легионер футболчилар ҳам керак. Лекин хорижликлар клубимизга келганидан сўнг, маҳаллий футболчилардан ҳар томонлама устун бўлиши ва уларга намуна бўлиши лозим.    

- Бироқ ҳеч қачон селекция жараёнидан кўнглингиз тўлмайди. Агарда имкониятимиз бўлганида, таркибни бунданда кучайтирган бўлардик. Лекин ҳозирги ҳаридларимиз ҳам чакки эмас. Қолганини вақт кўрсатади. Ғалаблар қанча кўп бўлса, хурсандчилик ҳам шунга яраша бўлади. Шу боис иккинчи даврада муваффақиятли ўйинларимиз кўп бўлсин. Барчаларинга яна бир бор, хуш келибсизлар деб қоламан.

Шундан сўнг “Нефтчи” клуби раиси Кападзе янги футболчиларни кенг жамоатга таништирди ва уларнинг иккинчи давра баҳсларида нечанчи рақамли либосларда ўйнаши маълум бўлди.

Унга кўра футболчиларга қуйидаги рақамлар тақдим этилди.

Акмал Холматов – 88.

Андрей Акопянц – 55.

Шерзод Ҳакимов – 90.

Сардор Мирзаев– 71.

Умид Қодиров – 6.

Сардор Раҳмонов – 33.

Тақдимот маросимининг иккинчи қисми “Қиргулис СК” стадионида кечди. Унда янги футболчилар тўп билан ишлаб, стадионга йиғилган ишқибозларга техник маҳоратларини намойиш этди.  

ОАВ ходимлари эса клуб раиси ва янги футболчилар билан суҳбатда бўлиб, блиц-интервьюлар уюштирилди. Шу тариқа бугунги тадбир ўз поёнига етди.  

manba:fcneftchi.uz